Ресей Федерациясы Еуразиялық экономикалық комиссияға ауыз суды міндетті цифрлық таңбалау жөніндегі ұсыныспен жүгінді. Олардың бастамасы бойынша Одақ елдері 2022 жылдың 1 наурызынан бастап өз аумағында қапталған ауыз су мен жасанды минералданған суды таңбалау туралы шешім қабылдауы мүмкін.
Сарапшылардың пікірінше, суды таңбалау заңсыз өнім көлемінің төмендеуіне, бизнес үшін дұрыс бәсекелестік ортаның қалыптасуына алып келеді және тұтынушылар үшін сапа мен қауіпсіздікке кепілдік береді. Бұл ретте, цифрлық таңбалауды енгізу өнімнің құнына әсер етпейді, бірақ контрафактіден нарықты" ағартуға " мүмкіндік береді.
ЕЭК кедендік-тарифтік және тарифтік емес реттеу департаментінің директоры Ваган Казарян тауардың әрбір бірлігі туралы мәліметтерді өндірушіге не импорттаушыға байланыстырып міндетті түрде бекіту тұтынушыны және бақылаушы органдарды өнім және оның шығу тегі туралы шынайы ақпаратпен қамтамасыз етеді деп есептейді.
"Әрине, тауарда штрихкодтың болуы оның қауіпсіздігіне кепілдік бере алмайды. Бірақ таңбалау жүйесін түрлі салалардағы басқа бақылау жүйелерімен интеграциялау нарықтағы контрафактілік және жалған өнімдермен күресте барынша тиімді нәтижелерге қол жеткізуге мүмкіндік береді", – деп атап өтті ол.
Айта кетейік, Қазақстанда тұтынушыларды контрафактілік өнімнен қорғау және тауарлар айналымының қадағалануын қамтамасыз ету үшін 2021 жылдың 1 шілдесінен бастап қапталған су мен құрамында қант бар сусындарды цифрлық таңбалау бойынша пилоттық жоба іске асырылуда. Пилот шеңберінде кәсіпкерлер білікті сарапшылармен бірлесіп, арнайы жабдықта цифрлық таңбалауды тегін тексере алады, өздерінің ішкі процестерін пысықтай алады, өнімге таңбалау кодтарын салудың оңтайлы жылдамдығын анықтай алады. Пилоттық жобаға өндірушілер, импорттаушылар, дистрибьюторлар және бөлшек сауда дүкендері қатыса алады.
