.png)
Еуразиялық экономикалық одақта тауарларды қадағалаудың бірыңғай жүйесінің арқасында тұтынушылар өнім туралы дәйекті ақпаратқа қол жеткізеді, бизнес операциялық шығындарды азайтады, ал мемлекеттер салықтардың төленуін бақылай алады, контрабанда деңгейін барынша азайтып, тұтынушыларды қорғауды қамтамасыз ете алады.
Бұл туралы бүгін «Антиконтрафакт-2021» IX Халықаралық форумы кезінде айтылды. Форумды Қазақстан Республикасының Үкіметі, Еуразиялық экономикалық комиссия, «Антиконтрафакт» Халықаралық қауымдастығы ұйымдастырды.
Айта кетейік, Форум 9 рет өткізіліп отыр және халықаралық ұйымдар, мемлекеттік органдар, бизнес және жұртшылық өкілдерінің зияткерлік меншік объектілеріне құқықтарды қорғаудың, сондай-ақ ЕАЭО шеңберінде өнімнің заңсыз айналымына қарсы іс-қимылдың маңызды мәселелері бойынша қарым-қатынасы үшін ашық алаңға айналды.
ЕАЭО Іскерлік Кеңесі Төралқасының мүшесі Станислав Наумовтың айтуынша, цифрландыру мемлекет үшін ғана емес, бизнес үшін де көптеген қосымша мүмкіндіктер ашады.
«Осы форумда ЕЭК-ке мүше мемлекеттердің экономикаларын жақындастырудың маңызды мәселелерін талқылаудың бірегей мүмкіндігі бар. Бүгінгі таңда цифрлық экономикаға көп көңіл бөлінуде. Бұл бизнес үшін де, мемлекет пен ЕЭК үшін де маңызды. Тәжірибе алмасу маңызды, бұл цифрландыруға сапалы көшуге мүмкіндік береді. Бәсекеге қабілетті экономика құра отырып, цифрлық экономика саласындағы озық тәжірибелермен бөлісу, таңбалау жүйесін енгізу қажет. Таңбалау жүйесі тұтынушылардың құқықтарын қорғау мүдделеріне жұмыс істейді деп айту маңызды», - деп атап өтті Станислав Наумов.
Форумға Цифрлық экономиканы дамыту орталығының басқарушы директоры (ҚР-дағы тауарларды таңбалау мен қадағалаудың бірыңғай операторы) Олжас Бектұров қатысты. Өз баяндамасында спикер Одақ елдерінде тауарларды қадағалаудың бірыңғай жүйесін құру тауарлардың еркін қозғалысы процестерін жеделдететінін, өзекті статистикалық және талдамалық есептілікті құру мүмкін болатынын, логистикалық тізбектер мен цифрлық көлік инфрақұрылымы оңтайландырылатынын атап өтті.
«Осының арқасында бизнес өкілдері операциялық шығындарды азайтады, қайталанатын және көптеген қатар бақылау жүйелері алынып тасталады, сондай-ақ нарықтағы жағдай туралы жаңа ақпарат көздерінің арқасында қосымша табыс алады. Сонымен қатар, адал кәсіпкерлер контрафактілік өнімді заңды өнімге ауыстыру арқылы кірісті арттыра алады. Бөлшек сауда желілеріне қажетті өнімді іздеу, тауарлардың нақты түрлерінің бағаларын бақылау және талдау оңайырақ болады. Тұтынушыларға өнім, оның сату нүктелерінде болуы және бағалары туралы толық ақпарат беріледі. Олар заңды, сапалы және қауіпсіз өнімді сатып ала алады», - деп атап өтті Олжас Бектұров.
Кездесу қорытындысы бойынша ЕАЭО елдерінде тауарларды таңбалау және қадағалау жүйесін енгізу мәселелері бойынша тұрақты тәжірибе алмасуда, ынтымақтастықты дамытуда және диалогта уағдаластыққа қол жеткізілді.
