Қазақстанда барлық дәрі-дәрмектерге енгізілген міндетті цифрлық таңбалау құрамында есірткі заттары бар препараттардың заңсыз айналымымен күресте тиімді құралға айналды. Бұл құқық қорғау және бақылаушы органдарға сол дәрілердің жолын әр кезеңде бақылауды күшейтуге мүмкіндік берді.
2024 жылғы 1 шілдеден кейін шығарылған барлық дәрі-дәрмектердің қаптамаларында өндірістен бастап дәріханаға дейінгі жолын бақылауға мүмкіндік беретін Data Matrix коды болуы тиіс.
«Tanba» Бірыңғай таңбалау және қадағалау операторының дәрі-дәрмек таңбалау жобасының жетекшісі Анар Қарибаеваның айтуынша, бұл тәсіл жалған дәрілердің таралуына және заңсыз саудаға жол бермеуге көмектеседі.
Бұған дейін Орталық коммуникациялар қызметінде өткен брифингте Денсаулық сақтау министрлігінің Медициналық және фармацевтикалық бақылау комитетінің төрағасы Бауыржан Жүсіпов те дәрі-дәрмектердің қозғалысын бақылауға арналған аналитикалық платформаның техникалық мүмкіндіктері жоғары екенін атап өтті.
Таңбалау жүйесі құқық қорғау органдарына да, салалық реттеушілерге де дәрі-дәрмектің нақты орналасуын нақты уақытта бақылауға мүмкіндік береді. Осылайша, міндетті таңбалау фармацевтика нарығының ашықтығын арттырып, пациенттердің қауіпсіздігін күшейтеді және саладағы адал бәсекенің дамуына жол ашады.
