«Tanba» Бірыңғай таңбалау және қадағалау операторы Қазақстан зергерлерінің алғашқы Конгресі аясында цифрлық таңбалау жүйесімен таныстырды. Таңбалау жобасының жетекшісі Олжас Алтаев бизнес өкілдеріне Қазақстанда цифрлық таңбалауды енгізу барысы, оның мүмкіндіктері мен мемлекет, бизнес және тұтынушылар үшін артықшылықтары туралы айтып берді.
Зергерлік бұйымдарды цифрлық таңбалау жобасы әр тауарға бірегей Data Matrix кодын енгізуді көздейді. Бұл кодта тауар түрі, өндіруші туралы мәлімет, жеке нөмір мен криптографиялық қорғаныс қамтылады. Таңбалау жүйесі өнімнің өндірістен немесе импорттан бастап соңғы тұтынушыға дейінгі барлық жолын дәл қадағалауға мүмкіндік береді.
Тұтынушылар үшін негізгі артықшылықтардың бірі – кодты сканерлеу арқылы тауардың заңдылығын тексеру мүмкіндігі. Бұл арқылы тауардың сипаттамасы, сәйкестік сертификаттары және шағым қалдыруға арналған нысан секілді егжей-тегжейлі ақпаратқа қол жеткізуге болады.
Олжас Алтаев Қазақстанда енгізіліп жатқан бұл таңбалау және қадағалап отыру технологиясы АҚШ, Үндістан, Қытай, Бразилия, Түркия, Еуропалық одақ және басқа да көптеген елдерде түрлі тауар топтары бойынша сәтті қолданылып жүргенін атап өтті.
Конгресс барысында зергерлік бұйымдарды таңбалау процесінің кезең-кезеңімен қалай жүзеге асырылатыны көрсетілді. Сонымен қатар таңбалау жүйесінде жұмыс істеудің қарапайымдылығы да таныстырылды. Бизнес өкілдеріне конвейерлік өндіріс қолданылатын, неғұрлым күрделі тауар топтарына арналған таңбалау жабдықтарының жұмысы салыстыру үшін көрсетілді.
